Sargoshi-e-Dil

Yeh teri yaad jo hai dil ke nihaN KHanoN maiN roshan ub tuk,
Jis tarah raat ke sunnatay maiN ho deep jala.
Sochta hooN maiN tujhay ub bhee usee tarah aey dost,
Kia tuJHay bhee mera hota hai gumaN? Yeh to bata.

Kia teri rooh bhee hai aik biyabaN sehra,
Kia tera dil bhee taRapta hai subho shaam? Bata.
MehfilaiN kaisee hee hoN, dost hoN her dum humrah,
Kia teri aanKH muJHay DHoonday hai her soo? Yeh bata.

Chilchilatee huee garmi maiN, jo JHulsa day badan,
Kia mera KHeyal lagay bad-e-saba tujh ko? bata.
Aur jub barf kee chader maiN lipat jaey yeh dil,
Garmi-e-yaad se ho jaey lahoo kia? Yeh bata.

Koi bhee rah chalooN, teree taraf lay jaey,
Rehguzar aur bhee hai koi zamanay maiN? Bata.
Abr-e-rehmat kee tarah piyar tera DHampay muJH ko,
TuJH ko bhee meree muhabbat ka hai ehsaas? Bata.

Jis tarah seep maiN motee, jis tarah jism maiN rooh,
Kia isi tarah tuJHay meree muhabbat bhee lagay? Yeh to bata.
Jis tarah piyasee zameeN per giray baarish kee PHuvar,
MuJH se mil ker teree be chainee ko mil jaey sukooN? Yeh to bata.

Koi dum mera teree yaad se KHalee nahee aey dost,
Koi dum tuJH ko meree yaad sataey kia? Bata.
Kis tarah merey shub-o-roz guzartey haiN BHala kaisay kahooN?
Kis tarah tu ne bitaey haiN yeh din raat? Bata.