Shajar-e-saya Dar

Main jub bhe aankhain moond laitee hoon,
Samay kee kai dihayaan beet jatee hain.
Achanak yoon lagta hai mujh ko,
Ke jaisay phir se main nannhee see bachee hoon.
Aur merey aagay peechay, her taraf merey,
Bohot se haseen rishtay hain.
Voh merey chahnay valey baray boorhay,
Ke jin kee aankhon kee neeli dhundlahat,
Aur kamzor haathon kee ubhree huee ragain,
Apnay under hazar dastanain chupaey baithee hain.
Un kee aankhon main voh be panah muhabbat,
Aur un ke haathon ke lams main kitnee chahut.
Voh zair- e- lub her gharee un ka,
Chupke chupke mujhay dua daina.
Un kee bay laus muhabbat thee yoon jaisay,
Tuptay sehra main baad-e-naseem chalay jaisay,
Aur sard berfeely chotion pe,
Goad kee narm garmee ho jaisay.
Voh saya dar shajar kee tarah rehay jub tuk,
Na koi gham tha mujhay, aur na koi khauf.
Voh jin ke dum se thee meree tamam be fikree,
Voh jin kee ulfat se tha aik alam-e-bekhudee;
Unhay jo khoya to yoon laga jaisay,
Ser se chadar sirak gaee jaisay.
Na koee dhaal rahee aur na koee saya,
Mahaz-e-jung main hoon tun tunha jaisay,
Dushmanon ke her vaar kee zud main hoon jaisay.
Bahay jaengay jis oar bhee lay jaegee qismet,
Ke zamana laut ker kabhee palat-ta naheen,
Un kee yadain rahaingee saath her dum,
Ke jaisay khoya naheen unko,
Voh paas hon jaisay.